“Trouble shouters” është titulli i filmit më të ri, të zhanrit aksion-komedi, ku do të interpretojnë Blerim Destani dhe reperi i dashur, Noizy. Dy artistët e njohur do të kenë rolin e dedektivëve në këtë prodhim kinematografik, xhirimet e të cilit po zhvillohen në Tiranë dhe Gjermani.

Pjesë e filmit do të jetë edhe aktorja e dashur e skenës shqiptare, Rajmonda Bulku. E ftuar ditën e sotme në “Wake up”, ajo tregoi më shumë rreth këtij projekti dhe rolit të saj, si dhe tregoi për momentin kur dëgjoi për herë të parë këngët e reperit.

“Ia kam dëgjuar këngët dhe e dua shumë”, Rajmonda

“Po, për fat jam duke xhiruar. Është film shqiptar, por tërë produksioni është gjerman. Jam me Blerim Destanin dhe Noizy-n. Noizy është djali im. Kur kam shkuar në xhirime, kam kërkuar në ‘Google’ për të dhe kam dëgjuar thuajse të gjitha këngët e tij. I thashë ‘Biri im të dëgjova, të njoha dhe të dua shumë’. Ai është shumë i mirë, djalë shumë i edukuar, në sheshxhirimet është një mrekulli, të dy, me gjithë Blerimin. Blerimin e kam pasur edhe herë tjetër djalë, në film, kështu që është e dyta herë që punoj me të”,- përfundoi ajo.